हस्तांतरण

हस्तांतरण

********

जीवाकडून जीवाकडे

हस्तांतरण जीवनाचे  

आहे युगा युगाचे 

हे गूढ निर्मितीचे

ही साखळी अमरत्वाची 

देहा वाचून वाहायची 

सोडूनही देहास या 

देहपणी मिरवायची 

नसेल तेव्हाही मी 

असेल तेव्हाही मी 

सांगतो बजावूनी

इथे जणू मलाच मी 

बाप जगतो मुलांमध्ये 

आहे कुठे वाचलेले 

हे साज गुणसूत्रातले 

राहतेच तिथे साचले 

पुन्हा मी पुन्हा मी 

येतच राहतो पुन्हा मी 

पुन्हा पुन्हा नवेपणाने 

जीर्णत्व भिरकावूनी

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️ 

दीपक

दीप

******

सांजवता दिन दीप उजळला

दत्ताच्या समोरी हळूच  ठेविला ॥१

दीप प्रकाशला गाभारा भरला

तम दाटलेला क्षणी दुरावला ॥२

इवला प्रकाश झाला घरभर

अन पुढे किती गेला दूरवर॥ ३

मग मिटू गेले थकलेले डोळे

शब्दाविन शब्द काही मनी आले ll४

भाग्य या दिव्याचे देई मज देवा

जळत पदाशी मिळावा विसावा ll५

तुझाच अंधार अन हा प्रकाश 

परी पेटण्याची मनास या आस ॥६

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️ 

लायक

लायक

******

नच का लायक तुझ्या मी पदाला 

सांगावे मजला दत्तात्रेया ॥१

अजुनी आत का भाव न जागला 

भेटी न मजला म्हणुनी ती ॥२

उघडे सताड अतृप्तीचे दार 

घुसतो अपार वारा आत ॥३

सरू आले जिणे जन्म आटाअटी 

रितेपण गाठी दिसे पुढे ॥४

झाली पारायणे झाल्या प्रदक्षिणा 

भाकली करुणा किती वेळा ॥५

काय तुझी भक्ती मज ना घडते 

नच काय होते भांडे रिते ॥६

तर मग फुटो पात्र ही अनंता 

ही निरर्थकता नको आता ॥७

असणे नसणे तेही तुझ्या हाती 

करावे विक्रांती काय मग ॥८

बाकी मनातले दत्ता तुज ठाव 

करणे उपाव मर्जी तुझी ॥९

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️ 

सरोवर

सरोवर

*******

त्या मोहमयी सरोवराचे जल 

चाखले तुम्ही एक वेळ 

तुम्हाला तिथे पुन्हा यावे वाटणे

आहे अगदी अटळ 

तो स्पर्श शितल मधुर 

ती जीवावर पडणारी भुरळ 

ते तृप्तीची अवीट महूर 

ते निस्पंदतेत जाणारे पळ 

किती विलक्षण असतात 

ती स्वप्नांची मदीर कमळ 

ते पेशी पेशीत उमटणारे कूजन 

ते रोमांचित होणारे तनमन 

आणि हरवून गेलेला काळ वेळ 

खरे तर ते असे सरोवर 

अचानक अनाकलनीयपणे 

सापडणे जीवनाच्या पथावर 

हा मोठा चमत्कारच 

आणि त्या सरोवराचे आमंत्रण 

शुभ्र बाहू पसरून 

आपल्या प्रतिबिंबासह 

आपल्याला घेणे सामावून 

अन अपूर्णतेला जीवनाच्या देणे कारण 

किती विलोभनीय असते .

तरीही ते मोहमयीच आहे

अन सोडून जाणेच आहे 

हे कडवट आणि दुःखद सत्य

व्यापून उरते येता जागृतीच्या काठावर 

मग मधूर सुखाचे स्वप्नाचे ते ठिकाण 

ठेवून हदयात निघतो आपण

ओढत नेते जीवन आपल्याला दूरवर 

त्याच आपल्या धुळीच्या रुळलेल्या

म्हटले तर ठरलेल्या-नियत वाटेवर

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️ 

अटळ

अटळ

******

दत्ता तुझे येणे आहे रे अटळ 

जरी काळ वेळ ठाव नाही ॥१ 

आगीत कापूर जळणे अटळ 

नसे फार वेळ थांबणे ते ॥२

लागे तुझा नाद सुटणे अटळ 

प्रारब्ध केवळ नाममात्र ॥३

येताच वसंत फुलणे अटळ 

सर्वांगी सुफळ होतो वृक्ष ॥४

भरताच पाणी वाहणे अटळ 

काठोकाठ तळं आत्म तृप्त ॥५

विक्रांत जाणतो दत्त हा कृपाळ

घेईन जवळ निश्चित रे ॥६

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️ 

नाते

नाते

*****

ज्या नात्यात भय नसते

ज्या नात्यात शंका नसते

ज्या नात्यात चिंता नसते

तेच नाते खरे असते .

ज्या नात्यात मागणे नसते

ज्या नात्यात वापरणे नसते

ज्या नात्यात देणे असते

तेच नाते बहरत असते

ज्या नात्यात क्षमा असते

ज्या नात्यात ममता असते

ज्या नात्यात ऋजुताअसते

तेच नाते टिकावु असते

आपण  नाव तयाला देतो

सखी बहिण बंधू म्हणतो

थोरासमोर आदराने झुकतो

ते नाते नावापुरते असते

जेव्हा नाते व्यवहारी होते

सोबत राहणे अपरीहार्य असते 

म्हटलं तर तेही नाते असते 

परंतु ते नाते 'ना' ते असते 

असे नातेही जगावे लागते 

वरवर खोटे हसावे लागते 

स्वतःलाही फसवावे लागते 

नाते ते प्लास्टिकचे फुल असते

क्वचित कुणाला कळते नाते 

क्वचित कुणाला सापडते नाते 

त्यांनी जीवापाड जपावे ते नाते

नातेच जीवनाला अर्थ देत असते

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️ 

नर्मदातीरी

नर्मदा तीरी

*********

असतील तर असोत सोबती 

नसतील तर नसोत सोबती 

सुटत असता जीवन गाठी 

देह असावा नर्मदे काठी 

असली तर असु देत मुक्ती 

नसली तर नसू देत मुक्ती 

तिच्या प्रेममयी तीरा वरती 

जन्मोजन्मी घडावी वस्ती 

तसे फार नच मागणे मोठे 

कधी जायचे ते ठरले असते 

पण हट्ट धरता आई ऐकते 

नियमालाही मुरड घालते 

रोज रोज ते करी तुण तुणे

रोज रोज मी मागे मागणे 

तुझ्या तीरावर घडो जगणे 

तुझ्या तीरावर देह सुटणे

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️