एक दत्त खरा

एक दत्त खरा

--
एक दत्त खरा
बाकी तो पसारा
भोवताली सारा
मज दिसे 
.
सारी खोटी खोटी
जगताची रिती
अवधूता प्रीती
जडू दिली 
. 
गेला भ्रम  जरी
वाहतो संसारी
आनंद उजेरी
अंतरात 
. 
अवघी तयाची 
असे कृपा दया 
कळू आली माया 
थोडी बहू 
.
विक्रांत विरळा
येथुनी सुटला
दत्ताला भेटला
अंतरंगी

.

© डॉ.विक्रांत प्रभाकर तिकोणे
https://kavitesathikavita.blogspot.com

भिकारी मी भिकारी

भिकारी  मी भिकारी

********************

भिकारी  मी भिकारी

या नरहरीचा भिकारी ..धृ..

आलो तया दारी

या गाणगापुरी   

भरी माझी झोळी

दत्ता, देई भक्ती खरी

मज गांजले विकारी

मज झोडीले संसारी

दत्ता येई लवकरी

सोडव रे झडकरी

ये दिन माथ्यावरी

हा जन्म वाट्यावरी

तुझ्याविना दत्ता कोण

घास मुखी या भरी

दे विक्रांता चाकरी

या याचका भाकरी

अथवा जावो प्राण हे

दत्ता तुझ्या दारी

 ***

© डॉ.विक्रांत प्रभाकर तिकोणे
https://kavitesathikavita.blogspot.com

धर्मपत्नी

धर्मपत्नी
***::***
मज माझी प्रिय
असे धर्मपत्नी
जीवनसंगिनी
धर्मशील ॥
तियेचे चारित्र्य
धवल उज्ज्वल
सुवर्ण झळाळ
जणू काही ॥
तिचे ते कर्तव्यी
सदैव जागणे
नसणे बहाणे
कसलेच ॥
तिची तत्परता
पूर्ण समर्पण
जाहले जीवन
तृप्त माझे ॥
धनिक घराची
अहंकार नाही
तुझे माझे काही
वदे ची ना ॥
उत्तम आवड
सदा जपतचे
जीव देत असे
जीवासाठी ॥
मुलांची जणू की
प्रत्यक्ष देैवत
ठेवितसे चित्त
तया  दक्ष ॥
स्वभावाने धीट
आणि रोकठोक
जीवन रसिक
गुणवती ॥
कधी थोडी फार
होते धुसफूस
खाताना तो ऊस
कटे जीभ॥
परी तो गोडवा
मुळी जात नाही
टाकवत नाही
मुळी सुद्धा ॥
अहो त्यात दोष
नसेच उसाचा
लोभ  खाणाऱ्यांचा
नडे काही ॥
खरेच मी असे
भाग्यवान पती
ऐसी भगवती
घरी माझे ॥
अंजना विक्रांत
घेते म्हणवून
सुखाने भरून
जातो मीच ॥

**
 © डॉ.विक्रांत प्रभाकर तिकोणे
https://kavitesathikavita.blogspot.com

संचित

संचित

***************
फळले संचित
जाहले उदित
वाढवून प्रीत
दत्ता प्रती ॥
मुख मागते हे
दत्त नाम घ्यावे
पाय चालू पाहे
गिरनार ॥
कृष्णेचे ते पाणी
लागो सदा अंगा
वाटते सर्वांगा
व्याकुळता ॥
भस्माचे ते लेणे
बहू गोड वाटे
वासना ती तुटे
कनकाची ॥
कधी टेकवीन
दत्त पदी शिर
वाहिण्या अधीर
प्रेम भक्ती ॥
मायबाप दत्ता
कृपा ही केली
विक्रांती जाहली
उपरती॥
**
 © डॉ.विक्रांत प्रभाकर तिकोणे
https://kavitesathikavita.blogspot.com

शक्तिचा जागर

शक्तिचा जागर
**********
नावाला नवरा
घर संसाराला
सोडता तयाला
येत नाही ॥
टोचून बोलतो
मारतो गांजतो
उपाशी ठेवतो
वेळोवेळा ॥
न दे खर्च पाणी
म्हणे घे पाहूनी
मजा ये मारूनी
स्वतः परी ॥
देहावरी हक्क
दाखवू पाहतो
मारतो छळतो
नाकारता ॥
का गं बाई अशी
राहते संसारी
वार स्वतःवरी
झेलूनिया ॥
नको कोंडलेली
राहू गोठ्यातली
गाय गांजलेली
कदापी तू  ॥
कशाला हवाय
धनी कुंकवाचा
पुरुषी जगाचा
मक्तेदार ॥
आदिमाया तूच
ओळख स्वतःला
घेऊन शुलाला
सिद्ध होई ॥
करी गं हुंकार
मिरव गजर
शक्तीचा जागर
दावी जगा ॥
विक्रांत विनवी
निद्रिस्त शक्तीला
प्रकट रूपाला
करी आता ॥

**
 © डॉ.विक्रांत प्रभाकर तिकोणे
https://kavitesathikavita.blogspot.com

दत्त भरलेला

 दत्त भरलेला

डोळीयात दत्त

हृदयात दत्त

जीवनात दत्त

भरलेला

निजण्यात दत्त

जगण्यात दत्त

स्वप्नातया  दत्त

भरलेला

स्मरणात दत्त

विस्मृतीत दत्त

काठोकाठ दत्त

भरलेला

कणोकणी दत्त

मनोमनी दत्त

विश्वाकार दत्त

भरलेला

दत्ताचा विक्रांत

म्हणे दत्त दत्त

जाणिवेत दत्त

भरलेला

.

© डॉ.विक्रांत प्रभाकर तिकोणे
https://kavitesathikavita.blogspot.com

मोडू दे रे खोडी

मोडू दे रे खोडी
****:*******
संसार सुखाची
तुटू दे रे गोडी
मोडू दे रे खोडी
दत्ता माझी ॥
बहु लाचावली
जिव्हा ही रसाला
आणि बोलण्याला
खोटे नाटे ॥
किती गोड वाटे
लोळणे निजने
डोळ्यांनी पाहणे
सुखवस्तू ॥
घडेना साधन
सद्ग्रंथ वाचन
संतांची वचन
स्मरेनाचि  ॥
नामाची संगत
कदापि घडेना
भजनी रमेना
चित्त द्विधा ॥
वाया गेला मंत्र
गुरूंनी दिधला
कोनाडी ठेवला
चिंतामणी ॥
मायबाप दत्ता
करा सोय काही
मार्गी तुझ्या नेई
सनातन ॥
भक्तीने भरू दे
साधने जडू दे
कृपेने भिजू दे
विक्रांत या ॥
 © डॉ.विक्रांत प्रभाकर तिकोणे
https://kavitesathikavita.blogspot.com
**+