वाट गिरनार

वाट गिरनार

घाट गिरनार

थाट गिरनार

फार छान ॥

तिथे बैसलासे 
श्रीदत्त ध्यानस्थ 

मुळ जो अश्वस्थ

जगताचे ॥

भक्तांना आधार

प्रेमळ साचार

वर्षतो अपार

कृपा दृष्टी ॥

सरते पायरी

उरते पायरी

हवीशी पायरी

वाटे सदा ॥

जाहाला दयाळ

श्रीदत्त कृपाळ

व्यापून आभाळ

जीवनाचे ॥

पाहतो विक्रांत

दत्त हृदयात

डुंबतो प्रेमात

गिरनारी ॥

© डॉ.विक्रांत प्रभाकर तिकोणे
http://kavitesathikavita.blogspot.in

दत्त कौतुक

दत्त कृपा २

****

रात्र रात्र जागवतोय 

मी दत्त गीत गातोय  

निज गेलीय उडून 

क्षण सुखाचा होतोय 

डोळा डोळ्याला लागेना 

दत्त कौतुक कळेना 

शब्द धबाबा पडती 

स्तुती थांबता थांबेना

पद करविता तोच 

शब्दां रचियता तोच 

मी तो खेळणे तयांचे

प्रेमे नाचवितो तोच 

गीती स्फुरण गोवून 

गुण पदात ओतून 

दत्त घेतसे सहज 

सेवा माझिया कडून 

किती होऊ उतराई 

जीव ओवाळू तयांसी 

बाप अवधूत माझा 

घेतो विक्रांता पदासी 

© डॉ.विक्रांत प्रभाकर तिकोणे
http://kavitesathikavita.blogspot.in

दत्त अवतार

दत्त अवतार 

************

तप सतीचे पाहून

सूर मनोमन भ्याले

भोगी हीनदीन झाले 

लोभी ठेव्यासी जडले

तप उजाडण्या तिचे

हेतू शरण ते गेले

ब्रह्मा विष्णु महेशा

त्यांनी साकडे घातले

नाट्य त्रिदेवांनी केले

पुत्र प्रेम स्वीकारले

सत्त्व मातेचे दावाया

तिघे साधुवेष ल्याले

नग्न भिक्षा मागूनिया

काही आक्रितही केले

माई पुढती गोंडस

क्षणी बालक ते झाले 

लीला अवतार थोर  

दत्त दुनियेत आले

चंद्र दुर्वासा सहित

भाग्य महिचे वाढले ॥

लीला विक्रांत वाचतो

क्रिडा दत्ताची वाणतो

माता अनुसया पदी

तन मन हे अर्पितो ॥

© डॉ.विक्रांत प्रभाकर तिकोणे
http://kavitesathikavita.blogspot.in

दत्त प्रेमाच्या कल्लोळी

दत्त कृपा

***

शब्द अनावर झाले 

भाव अलवार आले 

दत्त कृपेने वादळी 

मन उंच उंच गेले 

येई सुखाचे रोमांच 

डोळा दाटूनिया पाणी 

देह हलतो कंपनी 

प्राण गुंतला गगनी 

प्राण विसावा जीवाचा 

अर्थ कळला जन्माचा 

मेरू भेटला सुखाचा 

आता कोण मी कुणाचा 

येई पदरव कानी 

गंध केशर चंदनी 

देह गेला भारावून

दत्त मनाच्या अंगणी 

दत्त प्रेमाच्या कल्लोळी 

गेली हरवूनी वाणी 

विक्रांत शुन्याच्या घरी

झाला सौभाग्याचा धनी 

© डॉ.विक्रांत प्रभाकर तिकोणे
http://kavitesathikavita.blogspot.in

***

माझे गाणे गाणे सारे

माझे गाणे गाणे सारे 

देवा तुला वाहियले 

माझे जीणे जीणे सारे 

तुझ्या पदी ठेवियले

आणि काय देऊ तुला 

मजपाशी राहियेले 

कणकण माझा घे रे

 स्वप्न हो रे सजलेले

तुझ्यासाठी रात्रंदिन 

उरामध्ये दाटलेले 

भाव माझे सजलेले 

अवधूता मिटलेले

भक्त सारे स्मरतो मी 

दत्तकृपा भारलेले 

तैसी प्रीती उरी दाटो 

जीणे व्हावे मंतरले

कृपाळुवा माझे स्वामी 

हात कारे आखडले 

जळतेय हृदयात 

अट्टाहास सारे केले 

पुसोनिया विक्रांत हा 

शून्य करी जन्म झाले 

कळण्याच्या पलीकडे 

दावी ते रे असलेले

© डॉ.विक्रांत प्रभाकर तिकोणे
http://kavitesathikavita.blogspot.in

दत्ता तुझ्या हाती

दत्ता तुझ्या हाती

जीवनाची दोरी

तारी किंवा मारी

मर्जी तुझी ॥

फिरती खेळणी

वारीयाचे हाती

नाही स्वयं गती

तया काही ॥

वाहतेय पान

सलिल लहरी

देह तयावरी

जैसा त्याचा ॥

तैसे माझे तुज

असे समर्पण

सर्वस्व वाहून

दिगंबरा ॥

तुझ्या कृपेविन

न चले जीवन

कृपाळ होऊन

चालविशी ॥

विक्रांत निमिष

काळ उदरात

तव प्रकाशात 

उजळला ॥

© डॉ.विक्रांत प्रभाकर तिकोणे
http://kavitesathikavita.blogspot.in

दत्त पंथ

दत्त पंथ 

****:

होई धर्माला आधार

दत्त अवतार थोर

भुक्तीमुक्तीसाठी जनी

पंथ रचिले अपार ॥

नाथ अवधूत नागा

महाभाव अवलिया

धर्मपंथ मिळवून

केले ज्ञानी अवघिया ॥

मुख्य वैराग्य भूमिका

धन मानले मृत्तिका

किती मोक्षा लावियले

जागे करून विवेका ॥

दत्त पाया अध्यात्माचा

जथा जागे झालेल्यांचा

दत्त धर्म तो सेवेचा

जीवी दडल्या शिवाचा ॥

दत्त नाथ अनाथाचा

असे आसरा खुळ्यांचा

दत्त निर्धास्त निवारा

उधळल्या वासरांचा ॥

दत्त विक्रांती जाणला

माथ्यावरची धरला

जन्ममरणी वाहता

मला किनारा भेटला ॥

© डॉ.विक्रांत प्रभाकर तिकोणे
http://kavitesathikavita.blogspot.in