मरणा

मरणा

*****

जरा थांब ना रे माझिया मरणा 

जाणून घेऊ दे मज या जीवना ॥

सुखाचे दुःखाचे घेऊ दे उखाणे 

कधी चांदण्यात गाईन मी गाणे ॥

परी ते अवघे वर वरचे रे 

खोलवर मज डुबी घेऊ दे रे ॥

भिजलेले अंग छान ते रे होते 

उडवले पाणी गोड ते रे होते ॥

लेवूनी जीवन घडावे जगणे 

थांब ना जरासा बाकी ते रे होणे ॥

जाणल्या वाचून जीवन सुटणे 

प्रेमळा निर्मळा हे लाजिरवाणे ॥

नाही कधी तुज कोण म्हणू शके 

तुझी गोड मिठी सांग कुणा चुके ॥

अडकल्या विना पण घडो येणे 

त्यासाठी हवे रे मजला जाणणे ॥

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️