क्षणस्थ

कधी ग्रीष्मात नटला
कधी वर्षेत सजला
दोन्ही हातांनी भरून 
क्षण आताच थांबला ।

काय घडले काल नि
काय घडेल उद्याला
मना नको रे गमावू
काळ मोलाचा चालला ।

घेई हातात सुमने
फळे पिकून आलेले
नभ रंगांनी नटले
पाहा चांदणे भरले ।

हास्यी खळाळे बालक
दुवा देणारी म्हातारी
भाव विभ्रम मनाचे
सुख दुःखांच्या लकेरी ।

नको टिपूस चित्रात
नको पाठवू जगात
क्षण होई रे तो तू
स्थिर राहून मध्यात ।

डॉ.विक्रांत प्रभाकर तिकोणे
Http://kavitesathikavita.blogspot.in