कृपाळा दातारा

कृपाळा दातारा

************

कृपाळा दातारा

यावे करा त्वरा

वेटाळून जरा

गिळू पाहे

सरू आले तेल

जळू आली वात

प्राणांचा संघात

विझू पाहे

व्याधींची गर्जना

करते ठणाणा

स्मरणे घडेना

भक्ती तुझी

होई दत्तराया

ज्ञानाचा किरण

जाई प्रकाशून

जन्म माझा

मग विणलेले

वस्त्र हे जळून

जाऊ दे वाहून

आल्या वाटे

विक्रांत व्यथीत

आशेच्या राशीत

उभा हाकारीत

तुज दत्ता  

© डॉ..विक्रांत प्रभाकर तिकोणे
http://kavitesathikavita.blogspot.in

**** 

काय कठीण दत्ता

काय कठीण दत्ता

*********

तुज काय दत्ता

असे रे कठीण

ब्रह्मांडा कारण

श्वास तुझा ॥

जाणतोस देवा

मुंगीचे तू मन

साखरेचा कण

देई तिला ॥

विशाल आकार

जळी जलचर

तयाचे उदर

भरवितो ॥

अवघे भरून

असे कणोकण

कळल्यावाचून

उगा मीची॥

माझीही ओंजळ

ठेवू नको रीती

देई तव प्रीती

कणभर ॥

तुझिया विश्वात

तुझा हा विक्रांत

तुजला मागत

प्रेम तुझे ॥

***

© डॉ..विक्रांत प्रभाकर तिकोणे
http://kavitesathikavita.blogspot.in

****

दत्त दत्त म्हणो श्वास

दत्त दत्त म्हणो श्वास 

दत्त करो चित्ती वास 

हरदिनी हरक्षणी

मज घडो दत्त भास 

दुनियेच्या गोंधळात 

कानी पडो दत्तनाद

दत्त येथे दत्त तिथे 

कणोकणी पडसाद

दत्त असो सदा साथ

माझा धरूनिया हात

साक्षी प्रभू पाहणारा 

जाणो माझे मनोगत 

असा दत्त पुजियला  

विक्रांतने प्रार्थियला 

हृदयात ठेवूनिया

जन्म दत्ता वाहीयला

जाणिवेत असो दत्त 

नेणीवेत असो दत्त 

कोंदाटून जग सारे 

मला मीच दिसो दत्त     

© डॉ.विक्रांत प्रभाकर तिकोणे
http://kavitesathikavita.blogspot.in

दत्ताचे पाईक

दत्ताचे पाईक

*********

तुम्ही भाग्यवान

दत्ताचे पाईक

बंधू सकळिक

पुण्यवंत ॥

पादुका दर्शन

घडले तुम्हाला 

चैतन्ये न्हाईला  

ज्योतिर्मय ॥

केली गिरनारी 

प्रभू तुम्ही वारी

आनंद वोवरी

वावरला ॥

परम पावन

दत्ताचे अंगण

पाहिले जाऊन

काय वाणू ॥

आले बोलावणे

घडे तया जाणे

व्यर्थ ते चालणे

इतरांचे ॥

विक्रांत वंदीतो

तुमच्या पदाला

स्पर्शा ज्या घडला

गिरनार ॥

***

श्री गुरुदेव दत्त 

© डॉ..विक्रांत प्रभाकर तिकोणे
http://kavitesathikavita.blogspot.in

****

स्वप्न

I

****

चांद झुल्यात रुपेरी
स्वप्न सजून बसली
सुख आनंदी नाचरी
स्निग्ध प्रेमाने भारली

स्वप्न सानुली इवली
तारा टिकल्या एवढी
चार भिंतीत स्नेहाच्या
राही भरुनी तेवढी

स्वप्न ओंजळ भरली
हाती प्रसाद ठेवली
लाख आशिष तयात
कृपा जीवन ल्यायली

स्वप्न क्षणांची मनाची
झाडावरच्या खगांची
सदा चिवचीव मनी
जाग नवीन दिसाची

जग स्वप्नांचे आकाश
दाट वर्षने भरले
ताप जीवनाचे सारे
जणू सुखविण्या आले

स्वप्न आशा आकांक्षांचे
रूप कोंदण जीवनी
स्वप्न कातळात सुप्त
जणू ठेवलेली लेणी

© डॉ..विक्रांत प्रभाकर तिकोणे
http://kavitesathikavita.blogspot.in

दत्त राम

दत्त राम
*****

राम माझिया  मनात 
दत्त होऊन बसला
राम वदता भजता 
दत्त स्वरूपी दिसला 

दत्त तोच रामराय
प्रभू  सर्वत्र भरला
देव विरागी तापसी
माझ्या हृदयी बसला

झोळी खडावा नि छाटी
धुनी आकाश धरती
रामा दयाघना दत्ता
याच रूपावर प्रीती

दत्त विठ्ठल सावळा
दत्त रामात ठसला
दत्त कैवारी काशीत
शिवरूपात ओतला

भेद अभेदा सहित
देई रामराया मिठी
रूप अवधूत तुझे
मज दिसू दे रे दिठी

म्हणो एकांगी विक्रांत
द्वैत खेळात पडला
दत्तचित्ताच्या स्थितित
आत्म खेळात रंगला



© डॉ..विक्रांत प्रभाकर तिकोणे
http://kavitesathikavita.blogspot.in

दत्ताच्या कृपेने

दत्ताच्या कृपेने 

चालला हा जन्म 

अन्यथा मरून 

गेलो होतो ॥

घडते जगणे

दत्ताला स्मरत 

प्रारब्धा जाळत 

साठलेल्या ॥

काय केले पुण्य 

सखे बाई मी ग 

आनंदाचे जग 

सारे झाले ॥

आता फक्त एक 

मनात या हेत

पाहू डोळियात 

छबी त्यांची ॥

मग हा विक्रांत 

दत्त कीर्ती गंध 

होऊन विश्वात 

पसरेल ॥

॥अवधूत चिंतन श्री गुरुदेव दत्त ॥

© डॉ.विक्रांत प्रभाकर तिकोणे
http://kavitesathikavita.blogspot.in

****