शुक्रवार, २६ फेब्रुवारी, २०१६

प्रभू तुझा दास







प्रभू तुझा दास
मजला करावे
चरणासी घ्यावे
दत्तात्रेया  ||
अवघा हिंडलो
जन्म तृष्णेपाठी
तुझी गाठी भेटी  
झाली नाही ||
सुख शोधतांना
दुर्दशा पातलो
लोटूनिया आलो 
वेचले ते ||
अनाथा सदैव
तुची तो सांभाळी
भक्ता प्रतिपाळी
शरणागत  ||
कीर्ती तुझी जगी
गातात पुराणे
प्रत्ययास येणे
घडेल कै ||
विक्रांत उदास
हृदयात आस
संपले सायास
यत्नबळ ||

विक्रांत प्रभाकर तिकोणे 



गुरुवार, २५ फेब्रुवारी, २०१६

|| स्वामी लोकनाथ तीर्थ ||







तीर्थांचे ते तीर्थ
लोकनाथ तीर्थ
झाले हृदयात
विराजित ||

भाग्यवशे आलो
तयांच्या दारात
योग शक्तिपात
कळो आलाय ||

शिव प्रसादीत
सिद्धांचा हा पंथ
अगणित मुक्त
भाग्यवान ||

वैराग्याची कळा
अग्निचीच ज्वाळा
कृपेचा पुतळा
मूर्तिमंत ||

तया पदी आता
जावो जन्म सारा
मायेचा पसारा
मिटूनिया ||

विक्रांत प्रभाकर तिकोणे

मद



निरार्थ वाद | उथळ संवाद
शब्दात मद | साचलेला ||
मिळाली दैवाने | थोरली भाकरी |
परी शिरजोरी | डोईजड ||
माजले हे तण | वाढे बेगुमान |
मनात रोवून | बीज साऱ्या ||
लायकी वाचून | नाचती सोंगाडे |
तया पाया पडे | मिंधेराजे ||
तुझे माझे बळ | शेवटी केवळ |
पुष्ट वळवळ | गांडूळाची ||
पांढरी कॉलर | घाबरे मळाला ||
ऐकुनी नावाला | थोर थोर ||
अहाहा चालला | काय हा खेळ |
बाजार केवळ  | खिसे भरू ||
झाकले डोळे | घातला गॉगल |
विक्रांता पडळ | नयनाला  ||

विक्रांत प्रभाकर तिकोणे

बुधवार, २४ फेब्रुवारी, २०१६

सुखस्वप्ने सावजाची.... |





प्रतिक्षेच्या अंधारात
प्राण माझे थकले रे
वाट तुझी पाहतांना  
श्वास सारे संपले रे  

सारी रात्र या इथे मी  
नाही तुझा पदरव
भरूनि फक्त राहिले
निष्प्राण गूढ निरव

सारे भास चांदण्याचे
अश्रूत होती काजळ
ओघळून गेला व्यर्थ    
जीवनाचा या ओघळ

उभी मी इथे कधीची  
ठाव तुज असेल का
एक उल्का जळणारी
काय तुज कळेल का

पुन:पुन्हा यातना ही
होऊ दे रे या मनाला
अज्ञानवश जरी का
मोह स्पर्शे विखाराला

जळू देत रात्र सारी
काहिली होत जीवाची 
आज नीज येवू नये
सुखस्वप्ने सावजाची 

विक्रांत प्रभाकर तिकोणे




  

रिक्तत्ता

रिक्तत्ता ******* क्षणा क्षणाने कळल्या वाचूनी आयुष्य येते ऋतू घेवूनी  हसवून रडवून चोरपावलांनी रंग खेळूनी जाते उलटुनी  काय कमावल...