कवितेसाठी कविता

शनिवार, ८ जून, २०१९

दत्ता शिणलो रे

दत्ता शिणलो रे
************

दत्ता शिणलो रे शिणलो
तुझिया पदी मी आलो ॥
आता सरली रे ताकद
करी करुणा हे भगवंत ॥
जीव हा जगी होरपळे
करी तू वर्षा कृपाळे ॥
तुज वाचून रे मजला
कुणी नाही रे दयाळा ॥
जन्म गेला रे वाया
व्यर्थ शिणली ही काया॥
करू नको रे अव्हेर
कृपा करी दासावर ॥
विक्रांत भवात बुडता
बोल लागेल तुज दत्ता ॥

डॉ.विक्रांत प्रभाकर तिकोणे
http://kavitesathikavita.blogspot.in
००००००

शुक्रवार, ७ जून, २०१९

दत्त बोलावणे

दत्ता तुझे बोलावणे
***************

किती करू मी बहाणे
किती टाळू आणि येणे
कानी रोज निनादते
दत्ता तुझे बोलावणे ॥

संसाराची गोडी वेडी
वाढे आणखीन थोडी
मग रोज उदयावरी
जावूनिया थांबे गाडी ॥

ऐसा कैसा तू रे हट्टी
थट्टा करी जागोजागी
घाली पाडी तोंडघशी
अपमानाच्या वा आगी ॥

दारिद्रयाची देसी गादी
उपवासे पोट भरी
कानी कपाळी सतत
अनित्याचे गाण करी ॥

खेचूनिया नेशी तिथे
वैराग्यांच्या होती बाता
अचूकश्या मिळे लाथा
मोहबळे कुठे जाता ॥

होतो ऋजु कठोरसा
मातेसम माझ्यासाठी
ठेचा नि चटक्यातुनी
दत्त नाव आणी ओठी ॥

द्वाड कार्ट विक्रांत हे
सांभाळ रे आता तुझे
दत्त प्रेमे सदा नाचे
ऐसे काही देई भोजे ॥

गुरुवार, ६ जून, २०१९

साधू

साधू
*****
चिलीमीचे कश भरत ते होते
सवे काही बं बं घुमत ते होते
अध्यात्म तयांचे असले कसले
मजला मुळीच कळत नव्हते

जरी या जगाचे काहीच तयाला
सोयर सुतक मुळी ते नव्हते
भस्म देहावर टिळा भालावर
डोई वेढलेले जटाभार होते

गूढ शब्द काही ओठात तयांच्या
डोळ्यात जग वेगळेच होते
कुणी पोटभरू खरे कुणी होते
धुम्री मस्त कुणी त्यांचे तेच होते

विक्रांत तयाला नमितो दुरुनी
आग हाती घ्याया सांगा कोण जाते

डॉ.विक्रांत प्रभाकर तिकोणे
http://kavitesathikavita.blogspot.in
००००००

बुधवार, ५ जून, २०१९

गिरनार पौर्णिमा

गिरनार पौर्णिमा.
*************
शुभ्र चांदण्यात
शुभ्र पायवाट
रुपे पावलात
पसरले ॥

व्यापून नभास
शुभ्र पूर्ण चंद्र
भरला आनंद
पर्णो पर्णी ॥

दूरवर कुठे
गुरूंची शिखर
पदपदावर
परी भेट .॥

भोवती लहरी
वायूच्या नाचती
जणू की सांगती
चाल पुढे ॥

घडले दर्शन
पुण्य आरतीत
दाटे अंतरात
उजेड तो ॥

कुणी दिली भेट
कळे ना कुणास
विक्रांत पूर्वेस
सूर्य झाला॥

डॉ.विक्रांत प्रभाकर तिकोणे
http://kavitesathikavita.blogspot.in

मंगळवार, ४ जून, २०१९

आरसा

******

माझिया मनाचा

आरसा धुळीचा

तुझिया हाताचा

स्पर्श मागे ॥

मग मी नितळ

होवून केवळ

स्वरूप सोज्वळ

मिरवीन ॥

अंतरी निर्मळ

प्रेमाचा प्रकाश

अनंत आकाश

होईल रे ॥

असा मी घडता

तुज बोलाविता

होईल अनंता

साध्य काही ॥

मग तू येवून

पाहा डोकावून

मजला देऊन

तुझे पण.॥

http://kavitesathikavita.blogspot.in

गुरव सिस्टर

***************

या रुग्णालयातील

झुंजार मनस्वी व सरळ स्वभावाच्या

व्यक्तिमत्त्वाची व्यक्ती म्हणून

गुरव सिस्टर सदैव माझ्या ध्यानात राहतील

त्यांच्यामध्ये अनेक गुण अंगभूत आहेत

त्यापैकी त्यांच्यातील नेतृत्व गुण हा

आपल्याला प्रकर्षांने जाणवतो .

त्यांचा स्वभाव असा आहे कि

त्या सरळ प्रश्नाला भिडतात

माणूस ओळखतात

आणि समोरचा माणूस जसा असेल

तसाच व्यवहार त्याच्याशी करतात

संतांची वागताना त्या संत आहेत

उद्धटासी वागतांना उद्धट आहेत

आणि खटाशी वागतांना खटनट आहेत

क्रिकेटच्या भाषेत बोलायचं तर

म.तु.अगरवाल रुग्णालयाच्या

त्या पहिल्या फळीतील फलंदाज आहेत

रुग्णालयावर कुठले संकट आले

रुग्णालयातील व्यक्ती अडचणीत सापडली

कि ताबडतोब धाऊन जाणारा

त्यांचा स्वभाव आहे

त्यांच्या या स्वभावामुळेच

त्यांचा मनुष्य संग्रह हा फार मोठा आहे

रुग्णालयातील प्रत्येक कामगाराला

त्या त्याचा गुण व अवगुणांसह

पक्केपणी ओळखतात

एवढेच नव्हे तर

त्याचा इतिहास भुगोल बेरीज वजाबाकीहि

त्यांना ज्ञात आहे.

कामगाराला एकेरीत हाक मारून

काम करून घेण्याची त्यांची हातोटी !

त्याबद्दल मला खरोखर हेवा वाटतो

त्यात कुठल्याही अधिकारापेक्षा

त्यांच्या प्रेमाचा हक्क अधिक जाणवायचा.

सिस्टर भाऊक आहेत सोशिक आहेत

लढाऊ आहेत मनमिळावू आहेत

तशाच त्या एक आदर्श आई सुद्धा आहेत

त्यांनी त्यांच्या दोन्ही मुलींना

डॉक्टर करून त्यांचा वैद्यकीय सेवेचा वारसा

आपल्या पुढील पिढीला दिलेला आहे

ही खूप अभिमानास्पद आणि गौरवाची गोष्ट आहे

त्यांच्या बद्दल मला नेहमीच

एक रुखरुख वाटत आली

ती म्हणजे त्यांना पिवळा पट्टा

किंवा काळा पट्टा लावायला मिळाला नाही

त्यांना तसे पाहायला नक्कीच आवडले असते .

काही लोक काळ्या पट्ट्यासाठीच जन्माला आल्या आहेत

असे वाटते त्यापैकी त्या होत्या,आहेत .

पण तसं पाहिलं तर एक गोष्ट स्पष्टपणे जाणवते

ती म्हणजे कुठलाही प्रकारचा काळा पट्टा न लावताही

एक काळा पट्टा सदैव त्यांनी बांधलेला होता

या रुग्णालयाच्या त्या अनभिषिक्त मेट्रनच होत्या

तसेच त्यांना रुग्णांबद्दल वाटणारा

कळवळा व प्रेम हा त्यांच्या कर्तव्याचा भाग नव्हे

तर तो एक गुणधर्म होता

तो त्यांच्या शब्दाने कृतीने सहज व्यक्त होत होता

त्यात कुठल्याही प्रकारचा नाटकी अविर्भाव नव्हता

आपण केल्याच्या कृतीचा सार्थ अभिमान होता

पण मी केलेपणाच्या मोठेपणाचा आव नव्हता

गुरव सिस्टर बद्दल बोलायचे लिहायचे किती

लिहून लिहून कित्येक पाने खर्च होतील

इतका चांगुलपण व गुण त्यांच्यात आहेत .

मला त्यांनी सांगीतलेल्या कितीतरी

गोष्टी कथा प्रसंग अनुभव

माझ्यासाठी एक विशाल संग्रहच आहे.

चंदने सिस्टर, गुरव सिस्टर दिलपाके सिस्टर

यांच्या सोबत काम करतांना

आम्ही मेडीकल ऑफीसर किती निर्धास्त होतो

हे आम्हालाच ठावुक आहे.

तर अश्या या अत्यंत कणखर सरळ व

रुग्णालयाच्या आधारस्तंभ असलेल्या गुरव सिस्टर

आपला सेवानिवृति निरोप घेत आहेत.

त्यांना जड अंतकरणाने प्रेमपुर्वक निरोप देतो.

अन आयुरोग्य लाभो हि प्रार्थना करतो .

http://kavitesathikavita.blogspot.

सोमवार, ३ जून, २०१९

द्वैताची पेरणी

द्वैतची पेरणी

****:

येतात विचार

जातात विचार

घेऊन आकार

जगताचा ॥

नाती गोती सारी

रंगवी रंगारी

अस्तित्व कुसरी

येवुनिया ॥

आत बाहेरील

जग ना वेगळे

असे एक सरे

क्षण रूप ॥

पदार्थ वाऱ्याचा

गोळा वा पाण्याचा

हाती का यायचा

कधी कोणा ॥

पाहता पाहता

बुडालो शून्यात

कुणी ना कुणात

राहियेले ॥

विक्रांत पाहता

डोळियांचा डोळा

आतलिया खेळा

ओसाडलो॥

दत्ताचिया वाणी

उतरली मनी