बाजार

 

विद्येचा बाजार खेळाचा बाजार 

धनाचा जोजार  जिथे तिथे 

देवाचा  बाजार दुव्याचा बाजार 

पाखंडी अपार  जागोजाग 

औषधी  बाजार दुःख डोहावर 

कंपन्यांनी थोर  रचियेला 

लग्नाचा बाजार  वस्तु  वधूवर 

माल प्रतवार  मांडलेला 

डॉक्टरी बाजार ज्ञान पैशावर

चाले उपचार  वसुलीला

शक्तीचा  बाजार  संघ मजदूर 

भोळा  कामगार  प्यादे फक्त 

सत्तेचा बाजार काळ्या धनावर

मता  मतावर  लक्ष्मी वास 

मायेचाच जोर चाले जगावर 

उगा  तोंडावर तत्व बित्व 

विक्रांत प्रभाकर

http://kavitesathikavita.blogspot.in/

अभिमानी रडणे ..

अभिमानाने असे रडणे

मस्त असते दोस्त

संतापाने असे फुटणे

रास्त असते दोस्त

मान खाली घालून तर

नेहमीच जगतो आम्ही

तुझ्यामुळे आकाश हे

छातीत भरते दोस्त

बाकी सारी त्यांची ती

नेहमीचीच हाणामारी

तुझ्यामुळे जखमांचे

शुभ्र फुल होते दोस्त

म्हणतीलही ते तुला

आहे ढाल पाठीवरती

पण अशी तलवार तेज

कुणाकडेच असते दोस्त

सारे सुप्त ज्वालामुखी

होते कधीच विझलेले

पण तुझ्या तडकण्याने

झाले आता पेटते दोस्त

विक्रांत प्रभाकर

http://kavitesathikavita.blogspot.in/

उपाधी...

कैसा अधिकार 
कसलीही सत्ता |
देवा तुझ्या हाता 

दोर माझी ||

चुकुनिया आला 
हातात अंकुश |
नको नको त्यास 

ठेवू हाती   ||

करू नको मना 
व्यर्थ यातायात |
प्रभू स्मरणात 

आडकाठी ||

कशाला उपाधी 
आता दत्तनाथा |
होई मी वाहता 

कासावीस ||

करुनी भणंग 
देई अपमान |
अहंता पुसून 

टाक माझी  ||

तुझिया प्रेमाचा 
देवूनी प्रसाद |
जाहले प्रमाद 

घाली पोटी ||

आणिक न उठो 
मनात एषना |
संगती सज्जना 

घडो यावी ||

डॉ. विक्रांत प्रभाकर तिकोणे

http://kavitesathikavita.blogspot.in/