... अन्नपूर्णा ...

अगदी सहजतेन

जेव्हा कुणी देते फेकून

तयार सुंदर अन्न

मुले खात नाही म्हणून

वा जास्त झाले म्हणून

माझ्या अंगावर येतो शहारा

अस्वस्थ होते मन

कुपोषितांच्या झुंडी

धावतात मनातून

आक्रंदत बुभूक्षितागत

मोठमोठ्याने ओरडत

अन्न अन्न अन्न

संस्कारात जपलेली

अन्नपूर्णा अन

भेदरून उभी असते

कचराकुंडीचा काठ

घट्ट हातात धरून

   

विक्रांत प्रभाकर

http://kavitesathikavita.blogspot.in/

राज्य वाढले की

राज्य वाढले की राजे वाढतात

मंत्री वाढतात संत्री वाढतात

एक सिंहासन पिढ्यान पिढ्याचे

काही घराणी सुरु होतात

जुन्या राजाचे चमचे पळतात

पित्ते हरवतात खंडणी घालवतात

एक भाकर सुवर्ण लखलखीत

चटकन अर्धी करून टाकतात

चार वेसकर सरदार होतात

दहा लॉटऱ्या नव्या लागतात

पण लोकांचे काय होते

पत्यावरचे राज्य बदलते

चार दिवस ते खुळ्यागत

गुलाल झेंडे मिरवत राहतात

नंतर मात्र तोच बाजार

तोच माल तीच येरझार

तेच शेत तीच बियाणं

नांगर शेत तेच खुरपण

तीच नोकरी पोटापुरती

रात्र काढणे बाजेवरती 

**** **** **** **

वाढोत राज्य तुकडे पडोत

घर कुणाचे वाडे भरोत

पण माणसास या इथ

दोनवेळचा घास मिळू देत 

 

विक्रांत प्रभाकर

http://kavitesathikavita.blogspot.in/

दु:ख सालं येतं कुठून

प्रेमात पडून
लग्न करून
दु:ख सालं
येतं कुठून  ||

तीस शोधून
नीट बघून
चुकलं कुठ
न ये कळून ||

पथ्य पाळून
व्रत घेवून
काय झालं
भलं वागून||

ती  न  माझी
मी न तिचा
तरीही चाले
रथ रवीचा ||

नशिबं असती
सारे म्हणती
कळून चुकलं
शेवटी शेवटी ||

विक्रांत प्रभाकर

http://kavitesathikavita.blogspot.in/