भक्तीचे मोजमाप

माझिया भक्तीचे

काय मोजमाप

लाजे आपोआप

मन माझे ||

म्हणावी साधना

तरी हसू येते

म्हणे डबक्याते

महासागर ||

बहु पातकांची

असावी गाठोडी

म्हणोनिया थडी

अडकलो ||

संतांचे आशिष

मागे असतात

परी चुकतात

मार्ग सारे  ||

गांडूळाना माती

जगण्याची प्रीती

तैश्या काही रिती

दिन जाये ||

विक्रांता सनाथ

करी दयाघन

दावुनी चरण

सुकुमार ||

भेटी आळवितो      

करीतो  प्रलाप

दत्त मायबाप

धाव माझे ||

विक्रांत प्रभाकर तिकोणे

http://kavitesathikavita.blogspot.in

प्रभू तुझा दास

प्रभू तुझा दास

मजला करावे

चरणासी घ्यावे

दत्तात्रेया  ||

अवघा हिंडलो

जन्म तृष्णेपाठी

तुझी गाठी भेटी  

झाली नाही ||

सुख शोधतांना

दुर्दशा पातलो

लोटूनिया आलो 

वेचले ते ||

अनाथा सदैव

तुची तो सांभाळी

भक्ता प्रतिपाळी

शरणागत  ||

कीर्ती तुझी जगी

गातात पुराणे

प्रत्ययास येणे

घडेल कै ||

विक्रांत उदास

हृदयात आस

संपले सायास

यत्नबळ ||

विक्रांत प्रभाकर तिकोणे 

http://kavitesathikavita.blogspot.in

|| स्वामी लोकनाथ तीर्थ ||

तीर्थांचे ते तीर्थ

लोकनाथ तीर्थ

झाले हृदयात

विराजित ||

भाग्यवशे आलो

तयांच्या दारात

योग शक्तिपात

कळो आलाय ||

शिव प्रसादीत

सिद्धांचा हा पंथ

अगणित मुक्त

भाग्यवान ||

वैराग्याची कळा

अग्निचीच ज्वाळा

कृपेचा पुतळा

मूर्तिमंत ||

तया पदी आता

जावो जन्म सारा

मायेचा पसारा

मिटूनिया ||

विक्रांत प्रभाकर तिकोणे

http://kavitesathikavita.blogspot.in

मद

निरार्थ वाद | उथळ संवाद

शब्दात मद | साचलेला ||

मिळाली दैवाने | थोरली भाकरी |

परी शिरजोरी | डोईजड ||

माजले हे तण | वाढे बेगुमान |

मनात रोवून | बीज साऱ्या ||

लायकी वाचून | नाचती सोंगाडे |

तया पाया पडे | मिंधेराजे ||

तुझे माझे बळ | शेवटी केवळ |

पुष्ट वळवळ | गांडूळाची ||

पांढरी कॉलर | घाबरे मळाला ||

ऐकुनी नावाला | थोर थोर ||

अहाहा चालला | काय हा खेळ |

बाजार केवळ  | खिसे भरू ||

झाकले डोळे | घातला गॉगल |

विक्रांता पडळ | नयनाला  ||

विक्रांत प्रभाकर तिकोणे

http://kavitesathikavita.blogspot.in