ठोकत ठोकत टाळ

ठोकत ठोकत टाळ

ते उड्या मारत होते

तारस्वरी तोंडपाठ

देवगाणी गात होते

शुभ्र टोप्या डोक्यावरी

शुभ्र स्वच्छ लेंगे शर्ट

गाली भाळी लाविलेले  

शुभ्र स्पष्ट नाम बोट

असा देव भेटेल का

प्रश्न माझा शिकलेला   

पुन्हा पुन्हा येत मनी

तोच करी जुना ताळा  

पण बेभान गातांना

त्यांना पूर्ण खात्री होती

ठामपणे संकीर्तनी  

उंच उंच उडी होती

विक्रांत प्रभाकर
http://kavitesathikavita.blogspot.in/

|| हनुमान ||

पराक्रमाची परमसीमा

सामर्थ्याचा अविष्कार

अष्टसिद्धींचे भांडार

बुद्धिमत्तेचा सागर

अन या सगळ्यांचा

सर्वोत्कृष्ट वापर

जर केला असेल तर

एकाच नाव येते समोर

वीर हनुमान .

...

तुमच्याकडे कितीही

आणि काहीही असले तरीही

तुम्ही थोर होवू शकत नाही

तुमच्याकडे जे काही आहे

ते तुम्ही कशाला वापरता

यावर तुमचे श्रेष्ठत्व ठरते

श्री हनुमंताच्या चरित्रातून

हेच अधोरेखित होते

अश्या संपूर्ण समर्पणाने

डोळस भक्तीने

भक्ताचाही देव होतो

अन देवा पेक्षाही  

अधिक प्रेमाला पात्र होतो

अधिक देवळात मिरवतो

जय हनुमान  

विक्रांत प्रभाकर
http://kavitesathikavita.blogspot.in/

बाबासाहेब ...

 

आमच्या हिंदुत्वावर थप्पड देवून

बाबासाहेब तुम्ही गेलात

आमचा त्याग करून

तुम्ही केलेत ते अयोग्य

असे मी कसे म्हणू शकेन

लाखो करोडो जणांना

तुम्ही दिलीत अस्मिता

अधिकार, एकीचे बळ

आणि शिकविले

माणूस म्हणून जगायला !

एका क्षणात पायरीच्या दगडाला

पोहचवले कळसाला

हे केवळ महामानवच करू शकतात

पण तुमचे ते जाणे

अगदी योग्य असूनही

माझ्या मनाला डाचत राहते

आमच्या बापजाद्याचे करंटेपण

पिढ्यानपिढ्याचे आंधळेपण

अरे आम्हाला एवढेही करता न आले

जन्माधारित उच्चनीचतेला

गाडता न आले (अजूनही....)

विक्रांत प्रभाकर
http://kavitesathikavita.blogspot.in/