कृपेची बाहुली
******
कृपेची बाहुली
मज मीच केले
जगी मिरविले
तुझ्या नावे ॥
लावियला टिळा
कोरुनी सुरेख
धवल हा वेष
चढविला ॥
वदे दत्त दत्त
जगा पडे धाक
श्रद्धेचा पाइक
धन्य झालो ॥
परी मुखवटा
गळतो हा खोटा
पाहू जाता लाटा
मनातील ॥
अजुनही इथे
मनाची च सत्ता
नामधारी दत्ता
दिसे तू रे ॥
देहबुद्धीचा या
करण्या पाडाव
दिसेना उपाव
अजुनिया ॥
कृपाळा तुजला
शरण शरण
उपाय अन्य न
दिसे मज ॥
ढोंग्याचे हे ढोंग
होवो आता खरे
विक्रांता या त्वरे
तेची करा.॥
डॉ.विक्रांत प्रभाकर तिकोणे
https://kavitesathikavita.blogspot.in
कोणत्याही टिप्पण्‍या नाहीत:
टिप्पणी पोस्ट करा