सोमवार, ३ ऑगस्ट, २०१५

मेघा...







मेघा बरस बरस
माझे पेटलेले श्वास
त्याची मिटव रे आस

मेघा ठिबक ठिबक
जैसा लिंगी अभिषेक
बीज शोधत एकेक

मेघा ओघळ ओघळ
गच्च दाटून आचळ
शुभ्र सतेज फेसाळ

मेघा बेभान बेभान
दाट माजवून रान
देई जीवनाचे दान 

मेघा सावर सावर
तुझे तांडव आवर
माझे मातीचेच घर

विक्रांत प्रभाकर
http://kavitesathikavita.blogspot.in/

रविवार, २ ऑगस्ट, २०१५

मैत्री आणि प्रेम (मैत्रीदिना निमित्त)



प्रेमाच्या खळखळाच्या आत
खोलवर संथपणे वाहणारी मैत्री
हीच प्रवाहाची आधार असते
आणि त्या प्रेमाचाही
मैत्री नसलेले प्रेम असते
एक उपचार देह गरजांचा
ओढून ताणून बांधलेली मोट
आजच्या उद्याच्या व्यवहाराची
फार भाग्यवान असतात ते  
ज्यांना प्रेमाआधी मित्र भेटतात
किंवा प्रेमामध्ये मित्र गवसतात

तशी तर मैत्रीची शक्यता
प्रत्येक नात्यात असते
प्रत्येक ओळखीत असते
प्रत्येक कोंदणात मैत्री
एक बहारदार रत्न असते
म्हणूनच ज्याला असतात
अनेक जवळचे जीवाभावाचे मित्र
कुठल्याही आर्थिक सामाजिक राजकीय
किंवा वैयक्तित लाभाच्या अपेक्षेविना
केवळ निखळ मैत्रीसाठी जवळ आलेले
ते जगातील सर्वात श्रीमंत लोक असतात

विक्रांत प्रभाकर




शनिवार, १ ऑगस्ट, २०१५

मागणे






दे कुरूपता दे विरूपता
पण उरात तयाची खंत नसू दे
दे सुरेखता दे गुणवत्ता
मन गर्वाने पण मत्त नसू दे
दे धनिकता दे संपन्नता
मोह तयाचा नच खोल रूतू दे
कर निष्कांचन दरिद्रता दे
लाचार मत्सर तयात नसू दे
हे दे अथवा मजला ते दे
तुझी स्मृती पण सदैव असू दे

 विक्रांत प्रभाकर
http://kavitesathikavita.blogspot.in/

माणूस म्हणून

माणूस म्हणून ****** माझ्या जीवीचे जिव्हार  गेले किती जरी दूर  जीव तुटे तयासाठी  याद येता हूर हूर रक्त माझेच तयात गुणसूत्रांची रा...