दाता कोण घेता

माझे मन तुला

टाकले देवूनी

तरीही विकार

येतात दाटुनी

कळल्या वाचुनी

येते हे घडुनी

हातातुनी पाणी

जाते ओघाळूनी

का न तू मन हे

घेतले अजुनी

का न मज देता

आले ते अजुनी

उदास अंतर

भरले व्यथेनी

दाता कोण घेता

न ये रे कळूनी

विक्रांत प्रभाकर

http://kavitesathikavita.blogspot.in/

संकीर्तनी

तुझे भक्त गाती

संकीर्तनी नाचती   

नकळे कसे काय

झपाटूनी जाती  

तो नाद तो आवेग

भक्तिभाव पाहूनी

मी ही जातो कधी

गर्दीत त्या मिसळूनी  

नाचतो अन गातो

हात ही उंचावूनी   

रितेपण माझे जाते

रिते रितेच राहुनी   

गमते मजला मग

व्यर्थ सारी करणी   

थांबतो मी येतो

बाजूस नाईलाजानी

विक्रांत प्रभाकर

http://kavitesathikavita.blogspot.in/