चला आज देश आठवू यात

चला आज देश आठवू यात

झेंडा फडकू यात

देश भक्तीची गीते गाऊ यात

नाही काही हरकत नाही

एक दिवस तर एक दिवस

एक होऊ यात !

नंतर बरीच कारणे आहेत

पुन्हा भांडायला

जात आहे धर्म आहे भाषा आहे प्रांत आहे

अन काहीच नसेल तर

कुठलीतरी अस्मिता काढताच येते

आपल्याला उकरून .

हा, आता उकरणारे वेगळे असतात

धूर्त असतात

जणू सुनियोजित कट करणारे असतात

पण माती तर आपणच उधळायला जातो

आणि मातीला सुद्धा आपणच जातो

आज जरा आराम मिळेल

ओढाताणीला भ्रष्टाचाराला अनीतीला

(अन तशीही आज सुटीच आहे )

आज तिरंगी वेष असतील

डिश असतील  

फलक असतील

मेकप सुद्धा तिरंगीच असतील

आज भरपूर सेल असतील

शुभेछांचे मेल असतील

मेसेज असतील

टीवीवर ठरलेले सिनेमे लागतील

तीच जुनी गाणी वाजतील

सत्तर वर्ष झाली

सत्तांतरावर सत्तांतर झाली

जयजयकार अन भाषणे झाली

पण कळू लागल्यापासून

मला काहीतरी हरवल्या वाटते

चुकल्या सारखे वाटते

मला वाटते

मी अजूनही शोधात आहे

या देशाच्या ...!!

डॉ.विक्रांत प्रभाकर तिकोणे

http://kavitesathikavita.blogspot.in/

आदेश कानात

नाथ महाराज

करा माझे काज

सवे दत्त राज

रूप दावा ||

विरक्तीचा अंश

ओपुनी हृदयी

ओढूनिया घेई

पदावरी ||

अलख ओठात

निरंजन मनी

मुद्रा घाली कानी

पंथराज ||

मग मी दयाळा

तुझिया दाराला

बांधून जीवाला

राहीन रे ||

तुजला भजत   

काजाशी जगेन   

दुनिया पुजीन  

शिवरूपे ||

आदेश कानात

ओपा माझे नाथ

विक्रांत मनात

तळमळी ||

विक्रांत प्रभाकर तिकोणे

http://kavitesathikavita.blogspot.in

संतसंग

केले दत्तराये उपकृत मला

संतसंग दिला मागितला ||

सत्संगाची राजे प्रभूचे प्रेमिक

भक्त अलौकिक भेटविले ||

एकटा उदास चालतांना वाट

गोकुळीचा थाट दावियला ||

ज्ञानाचे पुतळे ध्यानाचे पर्वत

भक्तीरूप व्यक्त सखे केले  ||

जीजी आलो आता माझ्या मी माहेरा

मिळाला निवारा जीवास या ||

आता मनोमळ सहज जाईल

पावेन निर्मळ निजरूप ||

सरो नाव गाव मागतो विक्रांत

संताच्या दारात जन्म जावो ||

डॉ.विक्रांत प्रभाकर तिकोणे

http://kavitesathikavita.blogspot.in/