मोकळा

 

मोकळा

********

करी रे मोकळा माझ्यातून मला 

घडवी दयाळा कृपेचा सोहळा 

सरो व्यवहार सर्व हा संसार

नको उपचार नको उपकार 

निर्बंध निराळा मेघ मी मोकळा 

हिंडत राहावा माईचा किनारा

नको मनी खंता दाणापाणी चिंता 

ओढून आकाश निघावे दिगंता

दत्त नाम घ्यावे स्वरुपा स्मरावे

गुरु सेवेलागी नित्य रत व्हावे 

याहून विक्रांता अन्य नको काही 

सर्वकाळ चित्त राहो तुझ्या पायी

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ 🕉️ .

अवधूता

अवधूता

*******

अवधूता तुझे गाणे 

मजला सुचत नाही 

मृदुंगाची साथ अन

टाळ झंकारत नाही ॥१

अवधूता तुझी वाट

मज सापडत नाही 

निशाणाच्या खुणा अन

ठसे ही दिसत नाही ॥२

अवधूता तुझे प्रेम 

मजला भेटत नाही .

संसाराची व्यथा अन

बंधन तुटत नाही ॥३

अवधूता शोधू कुठे 

कुणीच सांगत नाही 

धावतो मी रानोमाळ 

दिशा ती कळत नाही ॥४

अवधूता येई आता 

त्राण या देहात नाही 

पुसूनी प्रारब्ध माझे 

मजला मिठीत घेई ॥५

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️ 

खूण

खूण

****

मनाच्या कपाटी जपून ठेवला

बंद कुलुपात कुणा न दाविला ॥

तोच तो राजस सुंदर चेहरा 

अति मनोहर लोभस हसरा  ॥

कुणी ग चोरला कुणी ग लुटला 

होता जन्मभर खजिना जपला ॥

जाऊन गुरूला वृत्तांत वदला

वंदून पदाला उपाय पुसला  ॥

तोच ग अंतरी प्रकाश दाटला 

 सखा सर्वव्यापी सर्वत्र दिसला ॥

देई ज्ञानदेव खुण ती मजला

भ्रांतीत पडला जीव सुखावला ॥ 

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️