कृपा तुझी

कृपा तुझी

******

ज्ञानदेवी वृत्ती 

झाली तदाकार 

जगाचा विसर पडोनिया 

आनंद सागरी 

आनंदाची लाट 

होवून परत जावे जैसे 

चालो आता खेळ 

जन्म मरणाचा

भाव भक्ती साचा अबाधित 

अगा माझे माय 

सदा ऐसे करी 

तुझिया पदरी निजो वृत्ती 

 

सुखाचे आभाळी 

सुखाचा अंकुर

झाला तरुवर कृपा तुझी

विक्रांत हे बीज 

आडवाटेवरी 

गेले खोलवरी जीवनाच्या 

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ 🕉️ 

तुकडा आयुष्याचा

तुकडा आयुष्याचा 

*************

हा तुकडा आयुष्याचा 

टेकला आभाळाला 

अन्  धुरळा मातीचा

प्रकाशाचा झोत झाला 

जरी भाग्य मातीचे 

सदा असे भाळाला

गंध केशराचे मंद 

दव ओले देहाला 

तेच कण जीवनाचे 

विखुरले पानोपानी 

ओळख तृण फुलांनी 

दिली इवल्या स्मितांनी 

किती तुझी कृपा माय 

जन्म वाहे पाण्यातून

जागेपणी स्वप्न दिसे 

प्रेम झरे डोळ्यातून 

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ 🕉️ .

मिलन

मिलन

*****

राधा धारा वाहते प्राणात 

कृष्ण कुटस्थ वसे त्रिकूटात ॥

हालते डुलते अंग नि मोडते 

ढकलून सख्यांना धाव ती घेते ॥

तो निळूला तेजाचा पुतळा 

उभारून बाहू जणू की बिंदूला ॥

गोल्हाट औट ओलांडूनी घाट 

बेभान ती येते जणू की लाट ॥

तिये पदी पेटती लाख लाख तारे 

सुगंधाने भरुनिया वाहतात वारे ॥

अन पडे मिठी घनदाट तेजाची 

हरवते शुद्ध अवघ्या या जगाची ॥

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ .

संत शरण

संत शरण

*********

जावे संताला शरण । तेच करती निदान ।।

भवरोग ओळखून । करतात निवारण ।।

काय कुणाची चुकले । दोष कुठे ते मुरले ।।

नीट पाहाती कृपेने । बरे करती साधने ।।

कोण मोहाने दाटले । कुणा कामने गिळले ।।

कोण क्रोधात जळले । मद मत्सरे पिडले ।।

अति कुशल नेमके । मधु नीटसं मोजके ।।

देती पथ्य आवडते । व्याधी समूळ ती जाते ।।

विक्रांत संताचा ऋणी।  दवा दिली रे बांधुनि।।

🌾🌾🌾

© डॉ.विक्रांत प्रभाकर तिकोणे https://kavitesathikavita.blogspot.com ☘☘☘☘☘☘