लिहावितो गाणी दत्त

लिहवितो गाणी

दत्त माझ्या मनी

देई शिकवणी

माझी मला ||१||

मी तो भटकळ

पतित अडाणी

करी रीझवणी

प्रभू शब्दे ||२||

नेई पुढे पुढे

कौतुक करूनी

तयाची करणी

तोच जाणे ||३||

नका करू दोस्त

माझी भलावण

असे मी खेळण

तया हाती ||४||

जाणतो अवघे

पाहून विक्रांत

दत्त भगवंत  

सर्वव्यापी ||५|| 

डॉ.विक्रांत प्रभाकर तिकोने 

http://kavitesathikavita.blogspot.in

..................................

दुर्गुणाचे मूळ

सर्व दुर्गुणांचे |

मूळ अहंकार ।

घाव तयावर ।

आधी व्हावा |।१।|

राजा जिंकताच |

प्रजा हो लाचार।

शरण साचार |

येत असे।।२।।

आखलेला मार्ग |

येतसे दिसून।

पाहतो शोधून |

विरळाच।३।।

विक्रांता सज्ज

असे रणनीती ।

तलवार हाती |

उचलेना।।४ ।।

म्हणे अवधूता |

करी निर्दालन।

सर्वस्व वाहून।

दारी तुझ्या।।५ ।।

डॉ.विक्रांत प्रभाकर तिकोने 

http://kavitesathikavita.blogspot.in

क्षितीज भास

ती गर्दी ती माणसे

ते सूट ते बूट

ते अलंकार ती वर्दळ

ते रंग ते गंध

अन या सगळ्यात

कॅमेरागत

पुढे सरकणारे मन

होते क्षण क्षण टिपत

सारे निरखत

त्या कोलाहलाचा

एक भाग होवूनही  

त्यात वावरत

अलिप्तपणे ...

बाजूच्या क्रीडागंणावर

चाललेले क्रिकेट

फटक्यांची नजाकत

धावावर धावा  

पडणाऱ्या विकेट

सर्वत्र पसरलेली

धुळीची पुट

पण या जगाचे त्या जगाला

नव्हते सोयर सुतक....

आला तो गेला तो

एक पान दिवसाचे

उलटून पुढे सरकला तो

वेगळी जागा वेगळा ठसा

वेगळा रंग बस इतकेच

काळात निमाला एक सूर्यास्त

क्षितीज भास मागे ठेवत

डॉ.विक्रांत प्रभाकर तिकोणे

http://kavitesathikavita.blogspot.in

दत्तराज

साकारी नटला

प्रकाशी भरला

असुनी नसला

दत्तराज ||

सोहं सांगाती

प्राणाचीया गाठी  

लहरी उठती

स्वानंदाच्या  ||

रूप रस गंध

चित्री सजवला

शब्दात ठेविला

नाद रूपे ||

असे दिगंबर

कृपेचा तो मेघ

सर्वांगात ओघ

स्पंदनांचा ||

कळू आले सुख

आता माझे मला

विक्रांत बुडाला

चैतन्यात  ||

डॉ.विक्रांत प्रभाकर तिकोणे

http://kavitesathikavita.blogspot.in