भाग्यवान जन्म काही

भाग्यवान जन्म काही

योगभ्रष्ट असतात

रोमहर्षी कथा त्यांच्या

उरी आग लावतात

वाया गेला जन्म माझा

कानी काही सांगतात

पांगुळले पाय माझे

कुबड्याही तुटतात

ग्लानी येते औदासिन्य

कठोकाठ भरतात

नापसाची मार्कलिस्ट

जीवावर टांगतात

का रे दिली भूक अशी

ज्याची पूर्तताच नाही

रानोमाळ धावे पिसा

घडीभर छाया नाही

म्हणू नको केली नाही

काही आटाआटी मी ही

नावडतीचे मीठ त्वा

पण चाखलेच नाही

नसे जर पुण्य काही  

थोडा फक्त भाव दे रे

मरणाऱ्या चातकाच्या

मुखी जल थेंब दे रे  

विक्रांत प्रभाकर

http://kavitesathikavita.blogspot.in/

तुला वजा केल्यावर..

तुला वजा केल्यावर

वजाबाकी सवे

वजा करणाराही

उरत नाही   

असा तू कणोकणी

भरलेला मनोमनी

तुझ्या बाबतीत

होऊ शकतात  

त्या फक्त बेरजा

आणि गुणाकार  

प्रेमाच्या भक्तीच्या

ज्ञानाच्या आकलनाच्या

अन ज्यांना वाटते

आपण केली आहे

वजबाकी तुझी

नस्तिकतेच्या सिद्धांताने  

त्यांचे गणित खरोखर

संपलेले असते

विक्रांत प्रभाकर

http://kavitesathikavita.blogspot.in/

हद्दपार

कुणाच्या जगातून झालो आहे हद्दपार

म्हणून काही फार फरक पडत नाही यार

कुणासाठी भोगलेय किती काळे पाणी

तशी ही वनवासात गेली आहे जिन्दगानी

सोड यार साऱ्या बाता असतात या इथे

मैत्री प्रीती नाती हे तर स्वार्थाचेच तुकडे

ऐकून होतो जगाची रीत अशीच असते

दुसऱ्याचे घर जळता दुनिया पहाया जमते

कधी मी ही प्रेक्षक होतो आज तुम्ही आहात

पडेल पडदा माझाही दुसरा उघडेल क्षणात

विक्रांत प्रभाकर

http://kavitesathikavita.blogspot.in/

येणे घडू नये

आता येणे घडू नये

निरुद्देश जगण्यात

नभातील पाणी जिरो

मातीतल्या खळग्यात

उधळल्या गाण्यामध्ये

मना चूक पाहू नको

शिशिरात गळलेले  

तुझे पान शोधू नको

भेटेल ही तेथे काही

किंवा वारी फुका जाई

शोधण्याचा अट्टाहास

तुझे इथे कुणी नाही

जाणलेले सत्य पाही

पदरात काही नाही

फेकलेले उचलतो

मना मुळी लाज नाही

बहु झाले लेखन हे

शब्द संपतच नाही

जळलेल्या रानामध्ये

आग पेटतच नाही

 विक्रांत प्रभाकर

http://kavitesathikavita.blogspot.in/