एक बाल कविता

 

 एक बाल कविता 

घाबरगुंडी 

*****************

उंदीर बघुनी ताई ची 

ती घाबरगुंडी उडाली 

धूम ठोकून ती तो 

कॉट वरती चढली 

आवाजाने त्या गादी 

मागील पालही घाबरली 

सरसर करत ती मग 

माळ्यावर धावली 

पाल पाहून ताई ची 

बोबडीच वळली 

अन आईच्या अंगावरती

तिने उडी मारली 

तोल आईचा गेला ती 

पडता पडता वाचली 

एक धम्मक लाडू घेऊन 

ताई रुसून बसली

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ 🕉️ .

रुसणे

रुसणे

*****

तू रुसलेली डोळे फिरवून 

गाल फुगवून गोबरेसे ॥

समजूत तुझी वृथाच काढत 

होतो बोलत खोटे मी ही ॥

रुसणे फुगणे वरवर जरी 

उसळत उरी प्रेम होते ॥

अन गुंफले हात हातात 

मनधरणीत हसू फुलले ॥

नयनामधले दीप उजळले 

घरभर झाले वाती वाती ॥

त्या रुसण्याची गाठ मनात 

असे सुखावत  गोड किती ॥

🌾🌾🌾

© डॉ.विक्रांत प्रभाकर तिकोणे https://kavitesathikavita.blogspot.com ☘☘☘☘☘☘