ज्ञानीयाच्या गाठी

 

ज्ञानियाच्या गाठी 
************

ज्ञानियाच्या गाठी 
ज्ञानाच्याच गोष्टी 
भाकरीची पोटी 
याद नाही

येई जिवलगा
घेऊनिया हाती 
अमृताची वाटी 
काठोकाठ 

काय सांगू बाई 
शब्द कवतुक 
ओघळते सुख 
श्रवणात

बोलता बोलता 
जीवीचे ते गुज
सांगती सहज 
बहुमोल 



अदृष्य ते दृष्य
दिसू लागे डोळा 
भेटीचा सोहळा 
मनोरम

चैतन्याची कळा
चैतन्यात गोळा 
चैतन्य निराळा 
तरी भासे

जाहला सत्संग 
सत्याचाच संग
विक्रांत निसंग 
क्षणा भेटी

©डॉ.विक्रांत प्रभाकर तिकोणे

http://kavitesathikavita.blogspot.com

वेगळा

वेगळा 

*****

सुटला संदेह

काय माझा देह

राहतो ते गेह

कुणाचे ते ॥

सुटला हा खेळ

अवघा गोंधळ

ज्यात ताळमेळ

मुळी नाही

जन्मा आले तन

लिहिलेले मन

वाहणारा प्राण

अव्याहत

माझे तुझे त्यांचे

एकाच साच्याचे

सुखाचे दुःखाचे

मोजमाप 

विक्रांत वेगळा 

रुप नाव त्याला 

आणिक जयाला 

कळे तो ही 

दत्ता कळू दिले 

स्वप्न उगा आले 

मी पणे पडले 

जाणिवेला 

****

©डॉ.विक्रांत प्रभाकर तिकोणे

http://kavitesathikavita.blogspot.com