एक तुझी आस

एक तुझी आस
*************

जगण्या कारण
शोधले बरवे
अवघे फसवे
वाटे दत्ता

सरले उपाय
अर्थ जाणण्याचे
प्रतिक मनाचे
ढेपाळले

नकाराचा गळा
शब्द झाले गोळा
मिटून घे डोळा
शोधणारा

व्यर्थ गेलो आम्ही
अर्धवट मरू
कोणावर धरू
राग मग

असावी फाटकी
आपुलीच झोळी
म्हणूनी मोकळी
गमे सदा

विक्रांत शोधतो
चुकलेली गाडी
जगाच्या धबाडी
अडकून

एक तुझी आस
केवळ मनास
अवघा आभास
दूर करी

© डॉ..विक्रांत प्रभाकर तिकोणे
http://kavitesathikavita.blogspot.in

परानुभूती

परानुभूती

*******

अधाशी मनाला 

उन्मनी वाटली 

नशा काही केली 

दुसऱ्याची 

परी काही केल्या 

जाईना तो तोल 

सरेना नि बोल

अडकला 

फुकटची नशा

चढत नसावी 

इथली असावी 

रित काही 

आणि खिसा खाली 

नाहीं छण छण

कलाल कुठून 

काय देई 

जावे खाल मानी

इथून निघून

तोंड लपवून

ऐसे होते 

झिंगल्याचा भास

हरवून जाता

तुज दारी दत्ता

पुन्हा आलो

चौदावीचे स्तन्य

देई मज दत्ता

तुर्येच्या अमृता

पान करी

उनाड विक्रांत

विकला प्रेमाला

तुझिया भेटीला

सारे करी

© डॉ..विक्रांत प्रभाकर तिकोणे
http://kavitesathikavita.blogspot.in

****

स्वाधीन दत्ता

अजून अंधार 

असे सभोवार 

स्वप्नांना आधार 

डोळियांचा

तुझ्या प्रकाशाचा 

इवला किरण 

येईना दिसून

मज दत्ता 

भक्त म्हणवितो

जगी मिरवीतो 

कोरडा दावितो

आड जगा

व्यर्थ वाहे देह 

उगा पंचप्राण 

वाटते टाकून 

द्यावे आता

साऱ्याच कळ्यांनी 

यावे उमलून 

असे का लिहून 

ठेवियले

सारीच फळे नी 

पिकावी म्हणून 

वृक्ष का  हटून 

बसतसे 

जशी तुझी इच्छा 

यावे ते घडून 

तुझिया स्वाधीन

होतो दत्ता 

© डॉ..विक्रांत प्रभाकर तिकोणे
http://kavitesathikavita.blogspot.in

आसक्ति

आसक्ति
*******

कुणा आसक्तीत
वाटे महासुख
दिसे कुणी एक
भोग मग्न ॥

काय ते अवघे
आहे सम्मोहित
किंवा संभ्रहित
मन माझे ॥

वाटेचा उगाणा
लागता लागेना
आशेचा फळेना
वृक्ष येथे ॥

चालतो म्हणती
तया पथावर
अन्यथा व्यापार
सुटेचि ना ॥

असेल शेवटी 
रिक्त हस्त अंत
आणिक पायात
तेच चक्र ॥

विक्रांत संपली
असे सारी हौस
जगाचा उरूस
पाहण्याची ॥

दत्ता डोळीयांचा
सरू देत सारा
ज्ञानाच्या माहेरा
नेई मज ॥

© डॉ..विक्रांत प्रभाकर तिकोणे
http://kavitesathikavita.blogspot.in

दत्त सावरीता

दत्त सावरीता

***********

दत्त सावरता 

अंधारी पडता 

विषयी धावता 

वेळोवेळी॥

दत्त सांभाळीता 

संसारी धबाडी 

करिता कबाडी 

प्रारब्धात॥

दत्त सोडविता 

मरण कावडी 

देऊन तातडी 

भावभक्ती ॥

दत्त आवरिता

रडता पडता 

देऊनिया हाता 

कुण्या रुपी ॥

दत्त मोक्षदाता 

शरण पतिता

जप तप हाता 

शुद्ध कर्ता ॥

दत्त प्रेम दाता 

विक्रांत अनाथा

 पथी चालविता 

कृपासिंधू ॥

© डॉ..विक्रांत प्रभाकर तिकोणे

http://kavitesathikavita.blogspot.in

माताजी निर्मलादेवी

माताजी निर्मलादेवी  (मी माता निर्मला देवीचा भक्त नाही किंवा त्यांचा सहज योगाचा अनुयायी सुद्धा नाही  तरीही एक दिवस एका ठिकाणी अनपेक्षितरित्या जाणे झाले  तिथे निर्मला देवींचा एक छान मोठा फोटो होता  त्यासमोर नुसताच बसलो होतो तेव्हा आलेला हा अनुभव .) चैतन्य सळाळे  फोटोत सजले  पूजा पालवले  भक्तांचिया ॥ कृपेचा प्रसाद  होता ओघळत  प्राण उर्ध्व होत आसमंती ॥ कां ग माय अशी  करिशी करूणा  जरी मी पाहुणा  तुझे दारी ॥  कैसी ही घडी नि  कैसे येणे जाणे  परी तुझे देणे  कालातीत ॥ माता निर्मलाजी  माय जगताची  सहज योगाची  अधिष्ठात्री ॥ आई जगदंबा काय वाणू तुला  लागतो पायाला  विक्रांत हा ॥ © डॉ..विक्रांत प्रभाकर तिकोणे http://kavitesathikavita.blogspot.in

मासेवाली

मासेवाली

********

पुन्हा पुन्हा मुन्शिपाल्टी 

जरी तिचे छत तोडी

पुन्हा पुन्हा मासे वाली 

नवे आणूनियां जोडी 

झाडाखाली तिच्या तीच

हक्काचीच असे जागा 

टाप नाही कुणाचीच 

घेण्या तिजसी रे पंगा 

पापलेट सुरमई 

वाम बांगडे करली

झिंगा कोळंबी मांदेली

पाटावरी मांडलेली 

जरब डोळ्यात तिच्या 

शब्द आणि धारधार 

नजरेत येणाऱ्याला 

एकाच ती तोलणार 

सोन्याची माळ गळा 

कुंकू भाळी लावलेले 

अबोलीच्या वेणींमध्ये 

फूल कधी खोचलेले

रोजचेच गि-हाइक

बहुतेक ठरलेले

कमी जास्त जरी चाले 

विश्वासाने भरलेले

अविरत कष्ट तिचे 

जीवनाच्या समरात

 रुद्र शांत दिसे काली

 टेंबीयांच्या प्रकाशात 

© डॉ..विक्रांत प्रभाकर तिकोणे

http://kavitesathikavita.blogspot.in