पोर गोरटी

 

पोर गोरटी 
चित्त चोरटी 
गोड कलिका 
मुग्ध हासती । 
कोण कुणाची 
स्वप्न परांची 
राणी गुलाब 
जणू देशाची  । 
हासताच तू 
मी न उरलो 
बालपणीचा 
गंध जाहलो । 
तरुवेली या 
तुझ्या सोबती 
जीवन रंगी 
नव्या खुलती । 
हरित तृणे 
लाख करांनी  
तुज भेटती 
वाटा सजती  । 
ऋषी कन्या वा 
फुलराणी तू 
लेक लाडकी 
ती माझीच तू । 

डॉ.विक्रांत प्रभाकर तिकोने 
http://kavitesathikavita.blogspot.in

 

माझ्या नोटा तुला घेई

माझ्या नोटा तुला घेई

तुझ्या नोटा मला देई ||

काल फुगलेला खिसा

आज रद्दीवाला होई

लांब लागलेल्या रांगा

नंबर लागत नाही ||

झाला तर होऊ देत

तोटा मला वांधा नाही

काळा गोरा होण्यासाठी

समजकी ही फि भाई ||

कसे कुठे कमावले

कश्यासाठी चौकशी ही

बोलावून गँग तुझी   

गंगेत न्हावून घेई ||

ज्याच्या त्याच्या कडे आहे

जो तो म्हणे नाही नाही

राज्याच्या घरात काय

तिजोरी ती मुळी नाही ||

अडचण आहे खरी

आज उद्या सरेल ही

नोटा बदलून साऱ्या

वृत्ती बदलेल का ही ||

खरतर प्रश्न तसा

पैशाचा मुळी नाही

नोटा नसता खिशात   

चैन मनास नाही  ||

डॉ.विक्रांत प्रभाकर तिकोणे

http://kavitesathikavita.blogspot.in/

दत्तव्यापी

दत्त गाण्यात बोलतो

दत्त पाण्यात वाहतो

दत्त कानात सांगतो

गुज त्याचे ||१ ||

दत्त आकाश मोकळे

दत्त आभाळ सावळे

दत्त सोनेरी कोवळे

सूर्यबिंब ||२||

दत्त मूर्तीत सजला

दत्त विश्वात भरला

दत्त भक्तास दिसला

अंतर्बाह्य ||३||

दत्त जीवन विराट  

दत्त सूक्ष्मातली वाट

दत्त उदेली पहाट

उन्मेषाची ||४ ||

दत्त हृदयाची गती

दत्त श्वास पुकारती

दत्त म्हणू किती किती

तृप्ती ये ना ||५ ||

दत्त भजिला जगात

दत्त पाहिला मनात

दत्त तत्व स्वरुपात

विक्रांतच्या ||६ ||

डॉ विक्रांत प्रभाकर तिकोने
http://Kavitesathikavita.blogspot.in