राजा बोले

राजा बोले

*******

राजा बोले दळ हाले 

होय होय करू करू 

एक एक मान डोले ॥१

आणि झाले नाही तर 

नाही तर नाही तर

कानामध्ये घालू बोळे ॥२

शिपायाला देवू सुळ

सेनापली हद्दपार

नेमु  नवे मर्जीतले ॥३

देईल जो नजराना 

त्याच्याकडे डोळा काना

दरिद्री ते उगा मेले ॥४

तसा राजा मांडलिक 

वर कुणी नेमलेले

तया उरी बसलेले ॥५

शिपायांचा खेळ चाले 

आले आणि किती गेले

पोटासाठी किती मेले ॥६

आज आला आज गेला 

उद्याचे रे  बघू चला

देणे सारे ठरलेले ॥७

ऐका कोणी ऐकू नका

राजापुढे फक्त झुका 

दिन जाती उरलेले ॥८

होय होय करू करू 

हंड्यावर हंडे भरू 

गळू दे रे टाकी गळे  ॥९

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️ 

हिरो

हिरो

*****

इवलासा गर्व इवल्या देहात 

गाव पेटवत निघे कुणी ॥ १

म्हणे मी रे खरा सेवक जनाचा 

अडल्या कामाचा वाहवता ॥2

चोरी करे त्याची मान पकडीन 

काढेन ओकून आठ आणे ॥३

बाकी महाचोर कोट्यावधी थोर 

याची तिथवर पोच नाही ॥४

बिले बिलावर कोणी फाडतात 

खिसे कापतात साळसूद ॥५

परी त्यांची कर्म घडे नियमात 

वध ही होतात लिहूनिया ॥

तिथे हतबल हिरो खरा खोटा 

पिळतो शेपटा बैलाच्याच ॥७

कुणी म्हणतात असे हेकेखोर 

मोर चोरावर चलाख हा ॥८

कोणी म्हणतात मूर्ख हा अडेल 

जीव घालवेल हकनाक ॥९

अवघा विचित्र दत्ताचा बाजार 

साळसूद चोर कळू न ये ॥१०

विक्रांत कशात जरी काही नाही 

ओढूनिया नेई पूर्व कर्म ॥ ११

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘