इंद्रायणी प्रवाह
***********
पलीकडे पारावर जात होती धुतली धुणी
अलीकडे घाटावर न्हाते कोणी साबणानी
किती अवहेलना ही डोळीयात आले पाणी
धर्म पाणियाचा माई नेत होती निभावूनी
धर्म पाळत होते कोणी फेकूनिया तीत नाणी
कोणासही काही काही वाटत नव्हते मनी
तीरावर बाजारात दानधर्मी मग्न कुणी
आठवली माई रूपे ती पापताप नाशनी
गंगा यमुना नर्मदा पण तीच ती कहाणी
सरू दे गं अज्ञान हे धर्म येऊ दे कळूनी
एक एक तरंगात जगा दिसू दे चांदणी
इतकेच मागणे मी घेत होतो तिज मागूनी
आणि वळताच मागे कोणी हसे खळाळूनी
🌾🌾🌾
© डॉ.विक्रांत प्रभाकर तिकोणे
https://kavitesathikavita.blogspot.com
☘☘☘☘ 🕉️
