तुकडा काळाचा
************
एक तुकडा काळाचा तोंडावर फेकलेला जीवन असते आपले काही वेळ जगायला
एक कागद तेलकट सुखदुःख गुंडाळला
धर्मजात देशवेश दोरा वर बांधलेला
पडताच हातामध्ये क्षीण क्षीण होऊ लागतो
जो तो इथे हक्काने ओरबाडून घेऊ लागतो
फेकून देता येत नाही वाटून टाकता येत नाही
जपून ठेवावे तर मुळी सांभाळता येत नाही
कुणासाठी कागदात मिठाईचा ठेवा असतो
कुणासाठी दाहकसा मिरचीचा ठेचा असतो
असे का तसे का हे सांगण्यास कोणी नसते
सरताचं वाटा सोबत हरवून जाणे असते
मिळणार वाटा नवा किंवा मिळणार नाही
उरणार बोळा फक्त नवे वा घडणार काही
गृहीतके बहुत इथे नक्की कुणा ठाव नसे
सर सरून वाटे इथे जीवनाला अंत नसे
🌾🌾🌾
© डॉ.विक्रांत प्रभाकर तिकोणे
https://kavitesathikavita.blogspot.com
☘☘☘☘ 🕉️
