कवितेसाठी कविता: भुते

मंगळवार, १६ फेब्रुवारी, २०१६

जाहला गजर नौबत झडली

स्वारी ही आली श्री दत्ताची ||

झपाटली झाडे उठली धडाडी

चढले लोखंडी कमानीस ||

केस सोडलेले मान गरगरी

डोक्यास वर्तुळी घासताती ||

कुणी हुंकारती कुणी भांडताती

दत्ताशी घालती वाद मोठा ||

कुणी गडबडा लोळती सर्वत्र

पायाचे चक्र करुनिया ||

दात करकरा श्वास भरभरा

आता पुरे करा म्हणे कुणी ||

हताश घरचे जिवलग प्रिय

सरता उपाय थकलेले ||

मनाचे आजार भुतांचा बाजार

परंतु आधार भेटलेले ||

विक्रांत प्रभाकर तिकोणे

कवितेसाठी कविता