कवितेसाठी कविता: सोंगटी

बुधवार, २५ जानेवारी, २०२३

*****

कालचा पडदा तुझा मखमली कापडाचा

आज झाला आहे जणू वज्रकाय पोलादाचा ॥

काल तुझी साथ होती क्षणोक्षणी संगतीला

आज जणू काळ मध्ये युगा युगांचा लोटला ॥

जगणे ते भाग आहे अर्थ जरी बदलला

सुखाचाच भास येथे खेळ उदास चालला॥

मी कशास सांगू कुणा दर्द माझ्या मनातला

आणि हाती खेळ देऊ जगास या खेळण्याला ॥

तुझे काय कसे काही विचारण्या अर्थ नाही

कोरडेच पात्र सारे बोललीस जरी काही ॥

भेटू नको पुन्हा कधी दैवास आहे मागणे

मिटून घेतो लोचने दिसताच मी चांदणे ॥

सरतील दिवस हे सारेच सरे शेवटी

असे अमर वेदना जरी नवीन सोंगटी ॥

🌾🌾🌾

कवितेसाठी कविता