जाते कधी म्हणू नको .

जाते कधी म्हणू नको .

अवघड आहे सखी

तुझ्याहून दुरावणे   

लाख देशील निरोप

घडेना ग सावरणे  ||

रीतभात कळे मज

कळे खुळी लोकलाज

अनावर भावनांची 

पण देही उठे गाज  ||

कधीतरी कर डोळी

अमृताची बरसात

कधीतरी खेळ होळी

प्रणयाच्या अंगणात ||

हरवले गीत माझे

पैजनांच्या पावुलात

शोधू कुठे मन वेडे

खुळावले कंकणात ||

जाते कधी म्हणू नको

प्रीत माझी विदारून

तुझ्याविना जगतांना  

जाईल ग मी मरून  ||

चार क्षण विसावले

सवे तुझ्या विसरले

हरू देत क्षोभ सारे

दु:ख लोट दाटलेले ||

डॉ.विक्रांत प्रभाकर तिकोणे

http://kavitesathikavita.blogspot.in